De quen estamos a falar cando falamos de Iris? Da neta da Merla? Da Merla mesma? Da amante do asasino? Ou da propia asasina trans?

Iris é F/finita. Presa e pendurada cabeza abaixo nun paralepípedo de illamento falando nunha lingua de defuntos.

Refráctase ao traspasar o prisma das pingas de chuvia e non nos deixa de fascinar a prestidixitación finita coa que tensa o arco para dispararnos aos ollos.

COMBINACIÓN F/FINITA

combinatoria

combinación finita

finita en combinación

finita abrindo o combi no frost

frigorífico a bailar fox-trot

un iogur punteando unha muiñeira

finita desolada

corazón escarchado

finita pecha a neveira natatoria

finita estoxada de novo na cama

finita pon fin á realidade-finita

o desvarío de finita polos cómaros verdes

combinados varios de escarcha

finita solitaria e fríxida de si mesma

nada na neve que se precipita

solidaria e impúdica, corre polas agras

combinación finita que fica no chan

cal é a combinación secreta de toda ti?

innúmeras rotacións a percorren

pudor e rubor o seu único traxe

desolación tráxica de ti espida

desolación cómica de ti rotativa

muller tétrica a peitear cabelos

muller capilar mírase no espello

precipitacións de anfibolita celeste

a nova vida de finita confitada

fin de finita

é a hora agora de parafina

paramilitar e paranormal

para e non te mexas

nin un milímetro

ponte quieta métrica e decimal

centrifúgate de ti mesma que vén o prato voante

aterra alucinado nun pregue da túa íngua

máis ben afina a manobra no teu contorno orbital

orbita contra ti arbitral

parafina pouco afín a min

foi o discurso do extraterrestre

e marchou voando voante

para fina non foi unha decepción

definitivamente de fina tampouco se podía agardar moita cousa

indefinida nas definicións

orgasma (ou non)

parafina é un derivado do petróleo

non a querían na maior parte dos líquidos de freo

definir a querencia (ou non) definitiva

definitiva cando infinita: a boas horas!

tender cara o finito

cando unha pode ser inmensa intolerábel impía

empuñar unha hvsquarna e tallar membros como carballos

finita finda de momento a faena coa motoserra

no finde xa cortará máis

todo isto debullaba finita antes do almorzo

declinando toda responsabilidade reclinada en col da almofada

botou o polgar do pé fóra displicente energúmena e contractual

antano si, hoxe non

sobre a herba había orballo brétema feluxe

razón de máis

era soñar con céspede almofadado

respiración de néboa

baile calipso con unha mesma

basta de tanta masturbación

finita pregándose infinita

adquirindo formas diversas

un dragón unha égua

un raio de sol

finita ponse nomes en cada transfomación

linda rebeca estefanía

e velaquí que cando era estereofónica

chamouse sony con alta fidelidade

cando robótica, mariclair

en canto a fidelidade prefería ser polinómica

diversificándose a partir de basta

estarricouse bretemosa que non neboenta

pregándose e dobrándose

todo en rodopío

o seu fado cartesiano de progresión no espazo

a súa finita extensión matérica

miríada

milésima

milimétrica

millonésima

mamotrética

as súas mamas como dunas

beduínicas

sen acariñar recentemente

unhas veces andaba cuadrúpeda

outras bípeda

dependendo de como quixese dar de mamar

finita posuía infinitas carencias

segundo se mirase poliédrica

ou mesmamente cúbica

o seu lugar no infinito

a crisálida que lle deu orixe

as divisións e subdivisións

que máis que humana a facían ciborg

unha tectónica de placas

sísmica e volcánica

vulcanizada ás veces

recauchutada as máis das veces

finita finita finita!

infinitesimal despois da coma

cama e edredón fóra!

finita vai pór os zapatos de tacón

vainos deixar coa boca aberta

vai acortar o seu nome

nita será a nova nomenclatura

reducindo a finita nunha sílaba

nita non é muller fatal

nita non é nita non é

nita vén sendo mineral dunita

casiterita

ectoplasma

plancto

nit

monosilábica

monosacárida

nitrato nitrosa nitroglicerina

nit radical e libre

fin

*Instalación realizada por Xoán Torres na Galería Dodo Dadá de Ourense o 23/5/2025 para a presentación do libro-obxecto Cristal líquido.